Os galegos reciclaron no 2018 48.308 toneladas de vidro. Isto tradúcese en que cada habitante levou ao colector adecuado case 18 quilos de envases de cristal, en concreto 17,9 ou, o que é o mesmo, unha media de 68 unidades. Os datos reflicten unha tendencia máis que positiva, xa que Galicia rexistra o segundo maior incremento de España, cun 11 % máis de toneladas que no 2017. Os datos foron presentados pola conselleira de Medio Ambiente, Ánxeles Vázquez, e o xerente da zona Galicia-Asturias de Ecovidrio, Germán Fernández. A estas 48.000 toneladas súmanse outras 17.657 que non se tiraron no colector adecuado pero que se reciclaron as plantas de residuos urbanos. 

Por provincias, A Coruña é a que rexistra a maior taxa de reutilización, mentres que Ourense ten a menor porcentaxe. Talvez os efectos da reciclaxe dos envases non se entendan sen exemplos claros como os que achegou Germán Fernández. O vidro recolleito en Galicia no 2018 é equivalente a sete veces o peso da Torre Eiffel, e evita a extracción de 79.158 toneladas de pedra calcaria. Ademais, e no que respecta á contaminación ambiental, esta reciclaxe evitou a emisión á atmosfera de 38.260 toneladas de CO₂ ou, o que é o mesmo, o que gasta un avión en dar a volta ao mundo nove veces.  Galicia mellora os seus índices de reciclaxe, pero aínda hai comunidades, como País Vasco ou A Rioxa, que lle levan a dianteira, con máis de 27 quilos por persoa. Segundo os datos achegados por Ecovidrio, en España xa se reciclan practicamente oito de cada dez envases. Pero para poder levar a cabo este proceso é necesario que os cidadáns teñan colectores accesibles nos que poder depositar o vidro que consumen. Galicia é a cuarta comunidade con maior proporción de iglús verdes por persoa, un por cada 169 veciños, cun total de 15.973 repartidos por toda a xeografía. 

A hostalería é un dos sectores máis implicados nesta reciclaxe, e ao que Ecovidrio e a Consellería de Medio Ambiente destinan máis recursos. No 2018 visitáronse 1.014 establecementos e repartíronse 678 colectores específicos para estes locais. 

Ánxeles Vázquez, conselleira de Medio Ambiente, definiu estes resultados como «espectaculares», pero recordou que «aínda son mellorables». Unha das claves detrás destas cifras é a concienciación e a sensibilización, polo que a Xunta seguirá colaborando na posta en marcha de iniciativas como a campaña #Etidequenvessendo ou fomentando a reciclaxe en festas populares, eventos deportivos ou accións solidarias. 

Vía: La Voz de Galicia