Reciclar en Santa Comba ten premio!

Tropaverde é unha plataforma web que ten por obxectivo fomentar a reciclaxe e a responsabilidade ambiental entre a cidadanía premiando de forma directa as boas accións medioambientais.

A web tropaverde.org conecta os tres elementos necesarios para conseguir dito obxectivo:

• a cidadanía
• os lugares onde os cidadáns e cidadás podemos depositar residuos e onde nos premiarán con cheques da Tropaverde
• aqueles comercios e establecementos de hostalaría que colaboran aportando agasallos e/ou descontos

O funcionamento é moi sinxelo: cada vez que un cidadán ou cidadá deposita un residuo (nos lugares que se indican no apartado Gaña estrelas da web) recibe un cheque con estrelas (puntos). Esas estrelas o cidadán ou cidadá pódeas ir acumulando na súa conta (previa alta de balde na web) para trocalas por descontos e agasallos que aparecen no apartado Recompensas. As recompensas apórtanas os comercios e establecementos de hostalaría que colaboran coa plataforma.